Dramatísk rassaköst undir háfleygum tónum. Rýmisgreindaræfingar, hlátrasköll, blómasundhettur og brussugangur. Margrét Erla Maack stjórnar tveimur sundballetttímum 26. september, kl. 17 og kl. 20.

Tíminn sjálfur er ókeypis en þátttakendur greiða venjulegt gjald ofan í laugina. Um er að ræða þátttökutíma, ekki sýningu. Ekki þarf að skrá sig, bara mæta. Tíminn er öllum opinn - svo lengi sem fólk er synt og nær til botns. Börn undir 10 ára þurfa að hafa fullorðinn með sér.

Við erum Sundballettinn Eilífðin, og þið eruð Sundballettinn Eilífðin.

Íþróttavika Evrópu (European Week of Sport) er haldin ár hvert dagana 23.–30. september í yfir 40 Evrópulöndum. Markmið verkefnisins er að kynna íþróttir og almenna hreyfingu og sporna gegn auknu hreyfingarleysi meðal almennings. Íþróttavikan er ætluð öllum, óháð aldri, bakgrunni eða líkamlegu ástandi. Lögð er sérstök áhersla á að virkja grasrótina og hvetja fólk til að hreyfa sig meira í daglegu lífi. Evrópubúar sameinast undir slagorðinu #BeActive.