Hér er skemmtileg frásögn frá Fjölbrautaskóla Suðurlands um Íþróttaviku Evrópu og viðri #BeActive

Íþróttavika FSu tókst með miklum ágætum.  Borðtennisborð sem keypt var af því tilefni hefur verið í stanslausri notkun síðan og hjálpar til við blöndun nemenda frá mismunandi bæjarfélögum. 

Mánudaginn 23. september var treyjudagur í skólanum.  Þáttaka var góð, bæði meðal nemenda og starfsfólks.

Þriðjudaginn 24. september komu blakmennirnir Hafsteinn og Kristján Valdimarssynir í heimsókn til okkar í FSu.  Voru þeir með kynningu og spiltíma í blaki.  28 nemendur mættu og tóku þátt.

Miðvikudaginn 25. september var haldið borðtennismót í hádegisgatinu en hádegishléið er lengra á miðvikudögum og gefst þá nemendum tækifæri til að sinna félagslífi á meðan kennarar funda.  Þrjú borð voru fengin að láni frá borðtennisdeild UMF Selfoss auk þess sem nýtt borðtennisborð FSu var vígt.  24 nemendur tóku þátt í mótinu en vegna tímaleysis var ekki mögulegt að hafa fleiri keppendur.  Það er gaman að segja frá því að borðtennisborðið, sem staðsett er í miðrými skólans,  hefur vakið mikla lukku og er mikið notað, jafnvel sést til nemenda eftir að skóla er lokð í borðtennis. 

Í lok skóladags var svo boðið uppá kynningu og keppni í pílukasti.  Aðeins þrír mættu, einn nemandi og tveir starfsmenn.  Eflaust hafa margir verið búnir að fá nóg eftir langan skóladag og drifið sig beint heim.

Fimmtudaginn 26. september stóð íþróttaráð fyrir handboltaskotkeppni.  Handboltamark var borið yfir í miðrými skólans og mælitæki sem mælir hraða boltans staðsett fyrir aftan markið.  Sigurvegarinn skaut boltanum á 101km hraða.

Laugardaginn 28. september fóru 22 starfsmenn skólans í fjallgöngu.  Gengið var á Hátind í Grafningi.  Gangan vakti lukku og hefur verið ákveðið að hafa eina svona starfsmannafjallgöngu í hverjum mánuði.