Verkefnið Göngum í skólann 2026 hefst formlega í dag og stendur það til 7. október en þá er alþjóðlegi göngudagurinn í skólann (International Walk to School Day). Setningarathöfnin átti sér hins vegar stað í Árskóla á Sauðárkróki á föstudaginn síðastliðinn. Nemendur, starfsfólk og gestir komu saman á íþróttavelli skólans og gengu að athöfn lokinni stuttan hring um nágrennið.

Kristján Bjarni Halldórsson, skólastjóri Árskóla, bauð gesti og nemendur velkomna. Ragnhildur Skúladóttir, sviðstjóri Fræðslu- og almenningsíþróttasviðs ÍSÍ, kynnti verkefnið og Magnús Barðdal, sveitarstjóri Skagafjarðar, flutti ávarp. Þá flutti fulltrúi lögreglunnar stutt erindi um umferðaröryggi og öruggar ferðavenjur til og frá skóla.

Göngum í skólann hefur verið fastur liður í skólastarfi víða um land um árabil. Starfsfólk fræðslu- og almenningsíþróttasviðs ÍSÍ ferðast um landið á hverju hausti og setur verkefnið formlega af stað. Markmiðið er að hvetja nemendur og foreldra til að ganga, hjóla eða nota annan virkan ferðamáta til og frá skóla og auka þannig daglega hreyfingu og bæta heilsu.

Verkefninu er einnig ætlað að:

-efla færni barna til að ferðast á öruggan hátt til skóla,
-kenna reglur um umferðaröryggi,
-draga úr umferð við skóla,
-bæta loftgæði og öryggi í nágrenni skóla,
-auka vitund um umhverfismál og gönguvænt nærumhverfi.

Göngum í skólann og Ólympíuhlaup ÍSÍ eru hluti af Íþróttaviku Evrópu, BeActive, sem hvetur fólk á öllum aldri til aukinnar hreyfingar og þátttöku í íþróttum.

Samstarfs og styrktaraðilar Göngum í skólann eru European Commission #BeActive, Samgöngustofa, Heimili og skóli, Mennta- og barnamálaráðuneytið, Embætti landlæknis, Ríkislögreglustjóri og Sysavarnarfélagið Landsbjörg.

Hér má sjá fleiri myndir